«Анжиялъул» цIум

Анжиялъул цIум

Цо нухалда футболалъул гIащикъасухъе, гIурусалъ абуни, фанатасухъе, цIум кквезе щвана. ЧIагояб, кIудияб цIум батана гIамал мекъаб, ццидалаб, цебе ккаралда гозо кIутIизе хIадураб хIинчI. ЦIудул бетIергьанлъун вахъарас байбихьана гIанкIал, цурдул, цогидаб чан кквезе ва жинда аскIобе босун бачIине гьеб ругьун гьабизе. Амма гьесухъе кквезе щвараб «гьаваялъул хан» гьедин бигьа-бикъаго инсанасе мутIигIлъулеб тайпа батичIо. Кинго кIолеб букIинчIо гьелда чанахъанасул мурад бичIчIизабизе. Жиндихъе щвараб чанги гьелъ жинцаго тIутIун балаан, тIаде щварав жиндир бетIергьанасулги гьурмада ругънал лъезеги нахъе къалароан гьеб чIухIараб хIинчI. Гьединаб тунка-гIусиялдаса хадуб хIанчIидаса чанго хIули камулаан, гьелъул бетIергьанасул гьурмада гIурччинаб даруялъ лъугьинарурал чIахIиял тIанкIал цIикIкIунаан. Эркенлъи хирияб хIинчI бичизеги намусалъ къабул гьабулеб букIинчIо. Гьедин рекъел гьечIеб кьалда, гIазаб-гIакъубаялда унеб букIана гьел кIиязулго гIумpy.

Гьаниб ракIалде щвезабизе ккола спорт цебетIурал республикабазул гIемерисел гIолохъабиго гIадин, цIудул бетIергьанги футболалъул гIащикъ-
фанат вукIаравлъи. Гьесул ботIролъе бачIана хIикматаб пикру — жинца цIум кьелин, команда щулалъиялъе вичун восарав цо футболистасе, гьеб букIинин сайигъат, цIияв хважаинасул рокъоб гьеб гьанта рекъон лъугьинин, жинда тIасаги инин гьеб ругьун гьабиялдасан бугеб гIакъуба. ХIукму ккана цIум футболистасе сайгъат гьабизе.
Цо матч байбихьилелде цебе, зурмилги къололги бакъаналда гъоркь кьурдухъабаз чанго свери бахъана, гьеб цIакъго кIвар бугеб ва тарихиябин рикIкIине мустахIикъаб тадбир букIинги бихьизабун. Футболалъул фанатас цIум футболистасе сайгъат гьабуна, гьаб лахIзаталдаса хадуб гьеб бергьенлъиялъул гIаламатлъун — символлъун букIине биччантейиланги абун.
«Символалъул» бетIергьанлъун вахъарав футболист гьелъукьа дагьавго хIинкъулев вукIиндал, кIиябго квералъ къан бохдулги ккун, эхедеги борхизабун, босулеб букIана стадионалдасан.

Гьедин цIудуе щвана цIияв хважаинги, цIияб хъулухъги, гьеб лъугьана
чIагояб символлъун. Гьелдаса нахъе щибаб хIай байбихьилелде стадионалде данделъулаан фанатазул руккелал, гьезда цадахъ рукIунаан зурмихъабиги, къолохъабиги, кьурдухъабиги, байрахъчагIиги, шашликчагIиги, цIудуе квен босун рачIунел чагIиги. Вищун вукIана хасав цIудухъанги. Гьес чIагояб символ тIолабго халкъалда бихьуледухъ эхеде борхизе ва зурма-къолол бакъаналде дандекколедухъ хьвагIезабизе кколаан. ЦIудул букIараб рахIатаб гIумpy гIазабалъул цIураблъун лъугьана. Футболистазда цадахъ батIи-батIиял шагьаразде сапаралги, зурмил къвакъвайги, къолол дамдамиги, гьебги кодоб ккун кьурдулездасан бачIунеб букIараб квешаб махIги — кинабго гIадада унеб букIинчIо. Дагь-дагьккун загIиплъана цIум, гьеб цIакъ хIалакълъана, хIулаби дагьлъана, ццидахунеблъун лъугьана, сахаб къо гьелде бачIунеб букIинчIо.

ХIаялда къурал фанатал пашманго тIадруссунаан, твархолеб, кьаболеб бугеб цIум, бохдулги ккун, дализабун босун бачIунаан. Амма кигIан бахIарчияв футболистасдаги кIолароан цIудуда тIад велъанхъизе. Гьеб гьезие лъугьун букIана гьайкарлъун. Команда къолебго къолеб букIана. Ахирги гьеб бищун тIасияб лигаялдаса къватIибеги рехун, тIоцебесеб лигаялде ккараб мехалда, цIудуца цIудулаб гьабуна, гьелъ жибго жинцаго хвезабуна. Къеялъул рогьо хIехьезе кIун батиларо.

Автор: ПатиматАмаева
Фото-коллаж: Патимат Амаева


просмотров: 57535 Опубликовано: автор: admin размещено в: Ургъун бахъараб

Добавить комментарий

You must be logged in to post a comment.