ЦIодораб бахIри

ЦIодораб бахIри

Рохьил рацIцIалъиялда лъугьараб гьитIинабго майданалда дандчIвана дида нижер росулъа чанахъанги цо къокъабго кваридаги бухьун гьес цадахъ бачун бачIунеб букIараб гьесул гьвеги. ЦIакъго хIалакълъун, битIахъе тIад тIом бакъвараб гIадин лъугьун бугоан гьеб. ТIубараб анкьица ургьибе квен ккечIеб гIадин, мугъзада рекIун бугоан чехь, хьабалухъагIучIал рукIана рикIкIине бажаруледухъ къватIире загьирлъун. ЦIакъго гурхIилеб хIалалъ балагьун букIана гьеб гIусазда гьоркьоб къараб гьан бикIун хадубги кIалдиб тун дица чIамулеб букIараб накIкIигъотIол гIаркьелалдаса бекараб тIеренабго гIучIалъухъ. Балагьидал, гьелъул беразулъ загьирлъулеб букIана гьеб пакъир ракъул гIазабалъул къорикь гIезегIан мехалъ хутIун бугеблъи.

КIалдиб ккун букIараб гIучI дица чIинкьун ракьалде бортизабураб мехалда, кIибикIизабулаго рачIгун гьелда тIад речIчIизе гьвел гIедерлъи бихьидал, дир ракI дандекъан араб гIадин лъугьана. Гьанал махI бугеб гIучI гьелъ цIикIкIараб гъираялда къулчIана. Гьединаб «гьуинаб сайгъат» жиндие гьабуралъухъ дие баркала кьолеб бугеб кинигин, кIибикIизабулеб букIана гьелъ рачI. Гьеб дихъ балагьун чIана. Гьеб балагьиялъулъ загьирлъулеб букIана инсанасдехун, ай дидехун бугеб гьелъул рокьиги, бокьараб дир амру тIубазабизе бугеб хIадурлъиги, жиндие гьабураб гьитIинабго лъикIлъи бецIизе бажарилародайилан хьулги. Инсанасул гьеб ункъхIатIилаб гьудулалъе БетIергьанасдасан насиблъун бугин ккана нилъее, кIихIатIилазе Гьесул цIобалдалъун щваралдаса цIикIкIараб цIодорлъиги.
Дида тIаса берги босичIого, ункъабго квачIги сукIизабун, бегана гьеб битIахъе дир хIатIазда цебе.

Гьанже дие рес ккана гьелъухъ лъикIаб хIалалъ халгьабизе. Балагьараб мехалда, гьеб бугоан, кинабали батIагьабун, цIар лъезе лъалареб тайпаялъул гьой. Лъазе захIмалъулеб букIана кинаб кьералъул гьеб бугебалиги. КIалдир гажалги лъедерлъун ругоан. БакI-бакIалда ругъназул лъалкIалги рихьулел рукIана «херлъараб» квасуда гьоркьосан.
Гьелъухъ балагьун чIарав дир ботIролъе лъугьараб тIоцебесеб пикру букIана гьав чанахъанас гьеб анкьазги бакъун толеб батилин абураб. Дида лъана гьеб цIодораб гьведаги бичIчIун бугеблъи жиндир бетIергьанасдасан кваназе жо щун жиб ракъул хвалдаса хвасарлъулареблъи, кинги-щибги жинцаго жиндиего чIаголъи гьабичIони, жиб гьаб цогидазе гьарзаяб, жиндие мукъсанаб дунялалда халат хутIулареблъи.

- Щиб ккараб жакъа? Щварабищ чан? — ан гьикъана дица чанахъанасда, гьесул гьвеялъул хIакъалъулъ дир рекIелъе, лъугьарал пашманал пикраби рачахъизе бокьараб гIадин.
ХIарагицин бахчуледухъ киса-кибго тIад изолентаялъул «мусру» жемараб тункIиде, гIонсотIе гIадин, гьетIун чIарав чанахъанас халатаб хабар бицана жиндир чанахъанлъиялъул хIасилазул.
Ахирги гьеб чIалгIараб мехалда:
— Цо сигарет кье, — ян абуна гьес.
Гьесие кьезе сигареталда хадуб дица кисинибе квер бегьулеб бихьидал, гьесул гьве дихъ цо сундениги хьул лъураб гIадин, хIасратго балагьана. Чанахъанасе сигарет кьуна, амма гьесул гьвеялъе кьезе жо дихъ букIинчIо.

- Радалалдасаго я бухIичIо, я кваначIо, — ян абуна гьес, сигареталда цIа рекIинабулаго.
Кванда хурхараб рагIи жиндир бетIергьанасул кIалдисан бачIунеб рагIидал, гьвеялъ рачI кIибикIизабуна.
Гьанже гьеб машгъуллъун букIана харда тIасан «жидерго ишазде» рекерахъдилел ругел гIисинал рухIчIаголъабазде.
КIудияб гъираялда сигаретги бухIулаго, гьанже чанахъанас байбихьана жиндирго гьве беццизе. ТIубараб сагIаталъ бицунеб букIана гьелъул цIодорлъиялъул, тирилъиялъул, тавакалалъул. Гьелъул кумекалдалъун чан гьабиялъулъ лъугьунел ругел «бергьенлъабазул» хIакъалъулъ гьес гьерсал рицунеб мехалъ, гьесул рагIабаздаса намуслъараб гIадин, кьурун добехун буссунаан гьоркьо-гьоркьоб гьеб цIодораб гьве.

- Сигарет хутIичIебищ духъ? — ан суалги кьун, гьоркьоб къотIизабуна чанахъанас хабар. СагIаталдасаги цIикIкIун заманаялъ халатбахъараб чанахъанасул лъугIизего лъугIулареб харбихъ гIенеккун хутIарав дирги кванде хиял лъун букIана. Амма чIалгIанин дида дур чIандайилан абун, гьесда аскIоса нахъе ине рекъараб гьечIилан, яхI гьабун чIана.
Гьале цойидасан гьве хIадурлъана «давлаялда» тIаде кIанцIизе. ГIурччинаб харда гьоркьосан кIанцIун бачIунеб букIараб къверкъ хапун кIалдибе ккезабуна гьелъ. КIиго-лъабго нухалъ гажалги дандкьабизарун, жиндирго гIатIидаб рискIиялда жанисан ургьибе нухарегIана гьвеялъ гьеб «давла».
Гьоркьо-гьоркьоб дихъа сигарет гьаризе лъалхъараб мехалъ гурони, гьоркьоб къотIизе толеб букIинчIо чанахъанас хабар. Ракъул рахIатхвей гьанже тIубанго гIакъубаялде сверулеб букIаниги, гьесулгун къолъикI гьабизе къвакIи гIолеб букIинчIо, адаб гьечIолъи дидасан загьирлъизе бокьичIого.

Цойидасан чанахъанасул бахIри нижеда аскIоса тIагIана.
МаркIачIубер рукIкIунеб букIана. Гьве нижеда аскIоса тIагIаралдаса ункъо сагIатниги ана. Чанахъан жегихарги жиндирго гьве беццулев вукIана. Гьес гьереси бицана жинца гьеб чанида хадуб битIун анила, гьабсагIат рагIилила жиндихъе чан щванилан жинда лъазабизе гьеб хIапдолеб гьаракь.
Амма гьве я тIадбуссун бачIинчIо, я гьелъул хIапи рагIичIо.
Ахирги яхI гьабизе кIвечIого, тавакалги цIикIкIинабун, дица чанахъанасда абуна, дур гьединаб кутакаб гьве тIагIинеги бегьулин, гьеб балагьизе гIамал гьабун лъикIилан.

Дица цоцIул-кIицIул гьищтIараб мехалда, гьениб аскIобго букIараб хъархъида гъоркьа къватIибе лъугьун, кIибикIизабулаго рачIгун, дида аскIобе бачIана гьве. Жиндир бетIергьанасул гьерсазухъ гIенеккизе рекIее къабуллъичIеб гьеб ункъабго сагIаталъ гьениб аскIобго хъархъида гъоркь кьерун чIун букIун буго. Амма гьелъ цIодорлъи гьабизе ккана жиндир бетIергьанасул тункIил хъундагъ гьодилъ щвечIого хутIиялъе.
Чанахъанасул ццин чучун ана. ТалихIалъ, гьес дихъе къолъикI гьабун квер бегьун бачIана.

- Метер радалги вачIина дун гьаниве, — янги абун, ункъо-щуго галиялъ дидаса рикIкIалъидал, нахъехун вуссун ахIана:
— Метерги диеги гIурал сигаретал росизе кIочон тоге дуда! — ян.

Автор: ПатIимат Амаева
Фото-коллаж: Мухамед Аварский


просмотров: 16230 Опубликовано: автор: admin размещено в: Ургъун бахъараб

Добавить комментарий

You must be logged in to post a comment.