ГарцI — МухIума

ГарцI-МухIума

ГьоцIалъ росулъ йикIун йиго цо Залихайилан гIадан, гьелъул росги вукIун вуго Рихьуниса вачIун чIарав МухIума абурав чи. Жиндирго росулъ гьесул тIокIцIар -гарцI МухIума абун букIун буго. Мискинабго магIишат букIун буго гьезул. Залихае иццде лъадада хадуб араб бакIалдацин ахиралда гурони лъел цIезе щолеб букIун гьечIо.
Гьедин цо къоялъ, рукIкIарб заманалда, лъел цIун ячIунаго гьелда нухда ватун вуго цо чи. Щиб кинан цIехедал, гьев ватун вуго ххамил базарган, ххамал тIад къараб гIорцIенги тIагIун чара хун. Залихаца гьесда абула жиндир росасда лъалин гьеб киб бугебали , жидехъе вилълъаян. Гьеб батанани бащдаб къайи кьезе къотIи базарганасги гьабула.

Гьобол кьижарав мехалъ Залихаца рос витIула гIорцIен балагьизе. Сордо рогьинегIан балагьун цо хъитIниб батула гьеб. МухIумаца цо гъотIокь бухьун тола гьеб. Радал гьоболасда гьадинаб бакIалда бугилан бицуна.
ГIорцIен батарав базарганас вохун, къотIи гьабун букIараб МухIумаеги кьола. Росулъ цIакъ хехго тIибитIула хабар , МухIумада балъголъи лъалеб бугин. Залихалги ххамил цIиял гордалги рукъун дагьаб къимат бахуна. Гьебго заманаялда ханасул рокъоса тIагIуна буртIин. Гьелъул цIех-рех гьабун чапарзаби ритIула МухIума ханасухъе ахIун. МухIума, гьел рачIун кIалтIе щолеб параялъ, вукIуна гортIа лъураб гIечалде квер бегьулев. Цо гIеч босулаго , лъабабго гирун бачIуна гьеб. — ГIайналмалъад, лъабабгоги бачIинеб буго-ян ,борчIула гьесухъа.

КIалтIа чIун рукIарал чапарзаби сири бан лъугьуна, нилъ лъабалго рачIине рукIинги лъалеб бугин асда ян абун. Цинги жаниреги лъугьун гьез бицуна баргъич жидеца бикъун букIин, ва гьарула щиб гьабилеяли малъейилан. МухIумаца гьезда абула гьеб баргъич гIатIгун буцун, цо батIа гьабизе лъалеб гIадаб хъазие кваназе кьеян, ва жинда бицеян.
Ханасул кIалгIаялда гьесда бицуна цо рекъаб хъазие кьунилан буртIин, МухIумацаги ханасда абула буртIин бикъун, тIагIун гьечIин , гьеб пуланаб хъазил чохьониб бугилан.

Гьелдаса хадуб ханас гьав жиндирго гIакълучилъун тола, Залихаги кIалгIаялде яхъуна. Амма цеве вукIарав гIакълучиясул жахIда букIуна. Гьес абула ханасда жив боржуларин гьесул хIал бихьичIого. Хан разилъула, ахIула МухIумаги. ГIакълучи рагьдехун уна, гьесда гьениб бихьула гарцI. Кквезеян лъугьиндал гьеб кIанцIун уна, нахъеги кIанцIула, лъабабилеб нухалъ кквезе щола. Хъатикь гьебги ккун гьев жаниве лъугьуна , цинги гьикъула МухIумада жиндир хъатикь щиб бугебали лъаян.

Цинги гьав гъарин жиндаго ракI унтун, гьанже щиб гьабилеялеги лъаларого, жиндирго бетIер къотIулеблъиги лъан , жиндаго ракI гурхIун кIалъпла;
— Огь, гъарин, гарцI, цоцIул кIанцIана мун, амма борчIана, кIиабизе кIанцIана-борчIана, лъабабизе кибе мун борчIилеб-,абун. ГьакIкIан хутIарав гIакълучияс МухIумида цебе речIчIула гарцI -ЧанцIул кIанцIарабали цин лъалеб буго!-,ян абун.
Гьелдаса нахъе МухIумаги хIалхьиялда кIалгIадухъ вукIуна.

Автор Алиса Алдашева
Фото коллаж М.Аварский


просмотров: 54157 Опубликовано: автор: admin размещено в: Лъугьа-бахъараб

Добавить комментарий

You must be logged in to post a comment.