ГIахьвалавги «дежурный» гьанги

ГIахьвалавги дежурный  гьанги

МагIарухъе нахъе гIадамал раччун бетIербахъи гьабулел шоперзабаз гIемерисеб хIухьбахъи Сагъи-кьотIа гьабула.
Гьелъие багьаналъунги батила ихдалил къо гIадин къолощуцIол гьава-бакъ хисулеб ХIаригабурлъи бегизе ккейги, лъугIунго рахъунарел, чIамучIал ЛъаратIисезул свераби тейги, гьеб гIечIелъубе Садуса гъоркье КастIание бахъараб, Ралли-Даккар кIочараб нухдасан машина бачинги ва гьеб гуреб цойгидабги.ПалхIассил гIемерисел нухлулал как базе рукIа, кваназе рукIа, Сагъи-кьотIа лъалхъула.

Гьединго цонухалъ КIкIаратIе сапар бухьаравги рещтIуна Игьилдерил, тIадмагIарулазул росу-ракь рикIкIун цIарал лъурал ашбазазул цоялда.
Рагьараб гордонисан гIурул сас букIана рагIулеб, кванил нигIматазул махIалгун жубараб бацIцIадаб магIарул гьури-мучги бугоан бачIунеб жанибе. — Соус ! ан гьабуна гьас кIалъай хIалтIухъаналъде.
Цере лъурал релъарал ханазде гьав валелдего бачIана босун «соус»ги,
жиндир кьаралъиялъ гьанго тIад бихьулареб магьдиракьаги бугоан гьебгун цадахъ.

Кинго гьеб кваназе квечIого «соус»алдаги кьабун, магьдиракьаги букIахъе тун, куцалда квералги рахъулаго къватIив вахъана гьав.
Квещ-лъикI КIкIаратIеги щун нахъияб къоялъ тIадвуссунаго гьабго Сагъив лъалхъула нахъойги. Гъобго гордухъ гIодовги чIун гъобго «соус»ан ахIула гьанжесалаги.

Додинго тириго бачIуна гьебги амма цебе лъураб гьанал лага цIакъго лъайхъвай бугеблъун бихьула гьасда.
Гьеб кодоб босигун кинабго вас-вас лъугIула, унгоги добго магьдиракьа бугогурищ бачIун.
— Ле ясай, гьание яккея цо! ян ахIула дойго хIалтIухъаналде.
— Бицея вац щиб жегиги бокьараб, чайищ кофейищ? ан, щибго бичIчIуларей гьайги эххетула цее.
-Гьаб «дежурный гьанахъ» гIарац дица сонго кьун букIана! янги абун гьалагаб ГIанди-гIоролъе хьуризабун уна магьдиракьа цин бахъарав ГIахьвалас.
-Гьаб «недвижимость» нужер балансалдаса бахъана!ян тIадеги жубала.

КIинабго бичIчIарай гьалъги хехгьабун босун цIияб гьан гьасда цебе лъола. Цинги багIарлъун-хъахIлъун богорокъой тIерхьуна. ЦинтIаго гьенибги щур-щургун релъи хъуй бахъуна «дежурный гьанал» къваридаб къисмат рагIиндал.

Гьелдасан нахъе тIокIав «игьилдерил гIахьвалазухъ» гурого «цойгидал игьилдерихъе» хьвадуларев рагIула нилъер нухлулав.

Автор: Мурад Кураев
Фото-коллаж: Мухамед Аварский


просмотров: 79042 Опубликовано: автор: admin размещено в: Лъугьа-бахъараб

Добавить комментарий

You must be logged in to post a comment.