Лъабго пикру…

Пикраби

«ГIабдалзабазда гъорлъе ккедал гIакъиласги гIадалаб ххвел гьабизе ккола»
Гъ.ГъалбацIов.

Дун вукIана цо нухъалъ кIудияв хIакимлъун вищун жамагIаталъ. Дида ракIалде букIана дица дунялго тIегьазабилин гьанже, гIемер кумек гьабилин жамагIаталъе.
Дица чIезабуна цо къо, дихъе жамагIат бачIунеб, гьеб жамагIаталъе хIажалъаралъул бицине.

РакьгIан гIемераб гIарацги буго, ресалги руго. Гьари дида щиб бокьаниги росдаего, районалъего, республикаялъего пайда бугел жал.
Валлагь гьабила нилъеца эб цинги, гьаб дирго чантинисаги кьела гIарац, бюджеталда бугеб гIечIони. Дир девиз «Все для народа! Все ради народа!»
ТIаде щвана гьеб къо. БачIана жамагIат.
Цин ГIали виччана жаниве, гьас гьарулеб буго 10 метра сетка-куналъул хIажат бугила, ГIумарил бачал жиндир хурире инчIого рукIине.
-ГIали, бегьуларищ гьеб раци заз бан, гIурдул рухьун гьабизе, цинги сетка босизе кьолеб гIарац цоги росдаего пайдаялъе хIалтIизабизе?
Гьеб данде ккечIо ГIалие. Ана кьун сетка босизе гIарац.
ГIумар вачIана 100 метра шлангалъул хIажат бугила, жиндирго рокъобе гохIдаса лъим бачине.
-ГIумар, бегьуларищ гьеб дурго рокъобе гуреб, росулъего бачине? Киназего пайда-хайир букIине?
Гьеб рекIее гIечIо ГIумарие. Ана кьун шланг босизе гIарац.

Гьедин нахъса къотIичIого рачIунел чагIиги руго, гьарулебги буго цо гIиси-бикъинаб базар, щивас жиндирго мурад, жамагIаталъего пайда щолелда тIад ургъулев чиго гьечIо.
Дида ракIалда букIана хутIараб гIарцухъниги гьаб МахIачхъалаялда жанир ругел нухал асфальт тIун къачIазе.
Гьелъие нухмалъизе восана хIалтIуде дирго вацгIал. ХIалтIухъанлъунги восана дирго мадугьал.
Чидар чиги гурелъул гьезда боржел гьабизе бегьилин вукIана.
КIиябго нажасалъ бикъун лъугIун батана кинабго бюджет.

-Я гьудул, туснахъалдайищ лъелел дирго чагIи? Цоги гIагарлъиялъ щибин абилеб дида?
Дарман тIагIараб бакIалде ккана дун. Гьасдани боржел гьабизе бегьулин тIамурав ватула тIуванго кутакав цIогьор. ГьечIо я хIалтIулел, я хIалтIизе махщел бугел. ЯхI-намус бугевцин чи хутIун гьечIо гьаб дир хIукуматалда.

Дирго гIагарал- божаразул чури бахчизе, дицаги бикъизе ккезехин буго.
ГIабдалзабазда гъорлъе ккедал гIакъиласги гIадалаб ххвел гьабизе ккола.

«Цо дир кIалъаялдасан кIиго магIна бичIчIулев,
КIал пасихIав чиясе чан жавгьар дица тараб…»
И.ГIалихIажияв.


просмотров: 6378 Опубликовано: автор: weux размещено в: Ургъун бахъараб

Добавить комментарий

You must be logged in to post a comment.