Налъи лъугIуларо….

Налъи лъугIуларо.....

Ракьа кIкIвиналде цебе цIудуца цин гIемер жоялъул хIисаб гьабулин абула умумуз. Гьединго абула, дармилъе лъугьиналде цин бухчаялъул бицалъи борцеянги. Гьединал бица-кициял лъаларев цо гьалмагъ щун вуго Хасавюрт базаралде чIужуялъе горде босизе. Берцин бихьараб гордил багьа-къадар кисаялда рекъарабги батичIого гьасул хIукму ккун буго гьебго шагьаралда, автослесарлъун хIалтIулев росуцоясухъе ине ва гьесухъа къарзалъе дагьаб гIарац босизе.

ГIемер кватIизабиларин абун росуцоясе рагIиги кьун, гьесухъа щвараб гIарцухъ гордеги босун, гьав гьалмагъ рокъове гIедегIун вуго чIужу йохизайизе.
Заманаялдасан, нахъойги гъобго базаралде щун вуго нилъер гьав абиял лъаларев гьалмагъ. Гъодинго лъималазе партал хъирщулаго камун буго гIарац. Лъихъадайин къарзалъе кепкал щвелаян ургъидал довго росоцояв ракIалде щун вуго.
Цебесеб налъулги пикруго гьабичIого гьанжеселъги цодагьаб гIарц къарзалъе кьеян гьарун буго автослесарасда.

Жиндир кверал мазутил цIун ругин, доб цо дир партал-хьит хисулеб «каптёркаялъу», мангиялда тIамураб аргида гъоркь бугин гIарац гьениса дуцаго босеян абун буго гьасги.
Уйилан ккарав гьаслмагъас цо чанцIулго хъирщун буго аргида гъоркь бакI.
Кинги батуларин гIарац мунгогIаги кьезе вачIаян ахIун буго.

Гьаругьинан цо басрияб чIартица квералги рацIун, жиндирго ургу-къайги битIа-бишизабун налъуласдехунги вусун гьасги абун буго.
-Доб цебесеб араб гьаниб лъун букIарабани, жакъад нахъе босизеги батилангурищ дуда элаваш ян.

Автор Мурад Кураев
Фото коллаж М.Аварский


просмотров: 39435 Опубликовано: автор: admin размещено в: Лъугьа-бахъараб

Добавить комментарий

You must be logged in to post a comment.