Сайгъат

Подарок

Гьаб иш ккана некlo, ридиги гъоркьго бугеб, тlopахьги тlадго хутlaраб, магlaрулазда гьоркьор эбелал бахькъосалги гьечleб, коммунизмалъул заманалда. Гьебги гlезагlaн божизеги захlматаб къагlидаялда. Божичloгоги кин рукlинел, божулеб гlaдинаб ишги бугелъул. Живго гьанив бицен гьабулев чиги магlaрул мухъилав бахьикъос вуго.

Иш ккана Цlyнтla районалъул Сагьада росулъ, руччабазул годекlaнилан къедаги хъвараб цо авалалда 23 абилеб февралалда. Паша Къурбанил чlyжу Паризаца жиндирго вацгlaлав мадугьаласе -Хантуе Советияб Армиялъул къоги баркун кьуна «кlyдияб сайгъат» тукенчи Сагlидихъаги росун 75 кепкил багьаял бихьиназул шватаби. Кин бугониги «кlyдияб сайгъаталдаса» вохун-хинлъун лъугьана Ханту. Цо рахъалъ ургъелги ккана гьелъие данде кьезесеб сайгъаталъулги. Амма 8-абилеб март тlaде щвезегlaн щибго ургъел гьабичloго чlyн вукlaна.

Паризайин абуни жинцаго кьураб «кlyдияб сайгъаталъухъ» данде щвезе бугеб сайигъаталъул пикрабазда йикlyнаан къойилго. Пикрабигиха гьалъул батlи-батlиял рукlyнаан.
-Дие дос импортный косынка бачlина. Кlваричlo, дагьалиш дир гьел ругел.
-Халгlaт бачlина, валлагь гьебги щибизе дие гурдего бачlина истамбул читалъул. Гьебги ретlyн Тlaгьирие чlyжу ячунеб къоялъ дир букlине бугеб берцинлъиха. Ракlaл квешлъун хвела «сагьадисезул ручаби» дунин абуни …….

Квешги-лъикlги тlaде щвана руччабазул къо, радал какги бан бусалъго вукlaна Хантуги. Циндаго, кьварараб чlyжуялъул гьаракьалъ тlyркlизавуна ав пулан.
-Ханту, — ян ахlaна гьалъ, — жакъа руччабазе ихтияр щвараб къо бугеблъи лъалищ дуда, дуца гьабизе ккола тlyбан рукъалъул хlaлтlи. Рукъ-бакlги бакlaре, квен-тlexги xlадуре.
Гъоркьгоги унтараб мугъзада михир гьалъги бачиндал кигlaн бокьинчloниги тlaде вахъине ккана. Къватlaхъе лъималги ун цохlo гъастla хутlaрав гъаримас иргадал гьабуна чlужуялъул малъа-хъвай. Рукъ-бакlги бакlа-бахарун, кванде жувана. Ролъул анлъго хинкlги гьабун гьелда данде жоялъе квалквадулев гьесда батана чloбогояб шишаги, родол цlyраб хьагги.

Хьагиниса родолги цlyн шиша, къваригlани букlинейилан, газеталъулъги жемун столалда тlaд лъун тана. Гьаниб щибдай бугоян тумбочкаялъуве ваккидал, ханазул цlyраб ведро батана. Гьалеха жоянги абун, рикlкlиндал 45 хоно батана. Гилавка гlaчиязул нахги рехун, киналго ханалги чleхьон гьабуна хайгун. Чlopoгоял ханалги рукlaралъурго лъуна. Щуго хинкlги лъикlaланго хайгунги гьас жинцаго гloдовги чlун кванана. Кванан вахъингун лъабго ханил гьабураб гlaнасеб хайгун хутlyла хьагиниб. Цо тlyбараб лъел гlopтоги гьекъон, Паризае сайигъаталъе щибдай кьелаян ургъулев гьасда столалда газеталъулъ жемараб кlyдияб гури батана. «Гьай хlaл чlахъаяй Гъирико, Паризае кьезе сайигъат хlaдурун бугеб къагlида» — ян гьебги къвалакь ккун, Паризае сайгъат кьезе уна.

-Рорчlaми мадугьалзаби, рохел гьарзалъаги. Барка Париза микьабилеб март, цlyраб шиша гlaдин рохалил цleги дур ракl, гьаб гьитlинаб сайгъатги къабул гьабе, — ян газеталъул гуриги Паризахъе кьун ав кlyтlyн вуссун рокъове ана.
Йохиялъ гloдойги зодойги хъвалпрей Паризаги гьав нухда регlизе нуцlил кlaлтle щвезегlaн ячlaна.

Гьоркьоб заман иналде ракlaрана руччаби годекlaнире. Ккара-таралъул бицунеб гlадатги букlиндал, бицине байбихьула руччабазги жодоего щварал сайгъатазул.
-Дие цебебухь бачlaна Расулица,- ян чlyxlадго абула Муслиматица.
-Дие Шамилица импортный кlaз бачlaна сверун парчадул симисги бугеб- илан абун яхъуна Гlaйшатги.
-Истамбул читалъул гурде диеги кьуна, — ян пахруго гьоркьое жуяла тукенчи Сагlидил чlyжу Патlинаги.

Рецула жодоего щварал сайгъатал цогидал ручабазги. Амма шаяли лъаларо, Париза юцlцlyн чlyн йикlyна.
-Париза дуе шиб Къурбаница кьураб, — ан гьикъана къоролзабазул пирсидатель Патlиматица,- яги дуе сайигъатищ кьечleб.
-Кьечlила дуе. Кьуна. Лъабго гъуршил багьаял щватаби дица кьураб мехалъ, дирго вацгlaл Хантуца дие анкь араб цleкlаб родол цlyн шиша бачlaна, — ян пашманлъун лъугьана гьай пакъир.

-Лее руччаби!! -Рилъа дихъе кваназе, -ян кlaнцlyн тlaде яхъана гьеб параялъ Гъирико. Квен гьабизе Ханту вукlaна радал тунги.
Руччаби жанире рачlине лъугьиндал Хантуца къватlибе нух босизе гlaмал гьабуна, амма Гъирико данде ккедал лъалхъана ва чlyжуялдехунги вуссун абуна:
-Дора хlaрчинир «хинкlaлги » руго, хьагиниб хайгунги буго кlaл гьикъун кванай, — ян бигьа гьабун къватlибе нух босана. Хадуб ккараб жоялъул дица бицинаро, бицинчloниги нужедагоги бичIчlизе батила. Гlaлие чlyжу ячинейилан данде гьарурал 45 хоноялъул хайгуналъул хутlaраб жоги, чlopoгоял ханазул ведроги ва хlaрччиниб цохlo хинкlги батараб мехалъ Гъирикода букlaраб къоялъулги бицинейишха ккелеб?

Автор Хизри Дидойский
Фото коллаж М.Аварский


просмотров: 25316 Опубликовано: автор: admin размещено в: Ургъун бахъараб

Добавить комментарий

You must be logged in to post a comment.