Вехь — Наполеон

Вехь_Наполеон


Цо магIарул росдал школалъул педагогазул тIолабго коллектив, жидер квалификация кутакалда эхеде борхун букIин чIезабураб экзаменги тIадегIанаб даражаялда кьун, гьелдаса рохиялъул асаралъ керен-ракIги цIун, цIикIкIараб гьира-шавкъалда гIагараб росулъе тIадруссун рачIунел рукIана. Музыка, кечI — кинабго букIана.

ГIолеб къадаралдасаги цIикIкIун «къулчIараб» коньякалъ учительзаби тIамулел рукIана, нухда унаго, автобусалда жаниб магIарул кьурди гьабизегицин. Гьедин аваданго, махсаро-хочIалда рачIунаго, кир рахчун рукIаралали лъалареб куцалда, цере рахъулел рукIана гьекъолеб жоялъул цIи-цIиял шушби. Къокъго абуни, гьел педагогазул рагъа-ракари релълъунаан, кIиабилеб соналъги гьобго классалда гьоркь хутIарал цIалдохъабаз учитель классалдаса къватIиве араб мехалда гьабулеб гъалмагъиралда.

Автобусалъул бокIнилъ, жиндирго пикрабазде машгъуллъун, гIодов чIун вукIана гьезул росулъа вехь — росуцояз цIикIкIун хIурмат гьабулев херав. Амма гьоркьо-гьоркьов гьев, лъимер гIадин, кIаркIариялда велъанхъулаан учительзабазул махсарабазда тIад.
Цо гIамал кIудияв учителас, вехьасул велъанхъи рекIее гIечIого батила, гьесул рахъалъ рекъечIеб рагIи рехун, махсаро гьабуна. Цогидазги, гьесда тIад рекъон, вехьасда речIчIулел рагIабазул чIорал цIикIкIинаруна, гьев гIад-хочI гьавун, гIа-гIаялда релъанхъана,
Гьимулаго гьезухъ гIенеккун вукIарав вехьасги байбихьана гьел учительзабазде гьужум.

- Нуж гьединал гIакъилал, гIемераб жо лъалел чагIи ратани, нужеца бице 1812 соналда ВатIанияб рагъулъ Франциялъул аскарал къеялъе гIилла.
Автобусалда жаниб сихIкъотIи лъугьана. Педагогал хIикмалъун, хаган хутIана лъикIалан мехалъ. Гьезда ракIалде кколаан вехьасда, чахъабазул гурони, цогидаб мацI лъалеб батиларилан. СихIкъотIи халатбахъана, учительзабазул къадру холеб бакIалде ккана иш.

- Россиялъул хасел ва жидерго улкаялдаса цIакъго рикIкIалъи, — ян байбихьана тарихалъул учителас.

- Гуро! — ян гьоркьоб къотIизабуна гьесул жаваб вехьас.
— Партизанал…
— Гуро!
— Квен-тIех гьечIого, ракъун хутIи…
— Гуро!

Кинаб жаваб гьез кьуниги, вехьас: «Гуро!» — ян цохIо рагIи кьвагьулеб букIана гьезде данде.
Педколлективалъул ццин бахъана, къец хIалуцана, херав вехьасде квер борхизецин къасд гьабулеб букIана цо-цояз. Сунцаниги гьезие кумек гьабичIо.

Ахирги, росулъе щолеб бакIалда, мукIурлъун гьикъана дов гIамал кIудияв учителас.
— ГIилла щиб?-ан.
ГIодовиччан, хъалияналъул кIкIуйдул парчаги магIарзухъа къватIибе буризабун, вехьас такрар гьаруна Наполеоница абурал рагIаби:

- Гьезда рагъизе лъалеб букIинчIо!!!


Автор: Наби Акаев
БачIана: ПатIимат Амаевалъ
Фотоколлаж: Мухамед Аварский


просмотров: 13938 Опубликовано: автор: admin размещено в: Лъугьа-бахъараб

Добавить комментарий

You must be logged in to post a comment.