«ХIадурав» Манап

ХIадурав Манап

Кибе гъугъарабги Гъуни-магIардеян абухъего «БагIарав векьарухъан» колхозалдаги кинабго къваригIел гьечIебщинаб хIалтIи Манапил бетIералде бачIунаан. Колхоз гIачиязул чIчIверу бокьал рахъизеги гьасде, силосалъул гвандабахъеги гьав, магIарда капурго хвараб жоялъул цIоко-тIехь бахъизеги гьасде…Гьединал ва гьезда релъарал,цойги колхозчагIи рахъунареб хIалтIаби гьабизе кидаго гьав пакъирасде буюрулаан пирсидателасги биргадирасги.

Живго Манапги вукIана кIвахI гьечIев, лебалав, чIетI гIадав чи ва жигарав хIалтIухъан. Манлъараб жо нахъчIвазе кIоларев чи вукIиналъ хIамидаса гъалдибергIанги гьасда рекIарал тIасаго рещтIунароан гьел хIакимзабиги.Саламатаб мухь кьолареб , хван щинал хIалтIаби колхозалъе гьарулев вукIун жиндирго рукъалъе жо гьабизе щунгутIиялдаса гIагалунги вукIунаан гьав.

Цо къоялъ жиндирго рагьда-къеда хIалтIи гьабула вугев гьасда рихьула агрономги биргадирги жиндихъего рачIунел. Гьанжеги цо жо манлъизе рачIина ругинха «чул тIутIал» ян пикруги гьабун гьас хехгьабун рагьдаса хIатIал ракIарула..

Дорасанго ригьнив квалквадилев Манапида бер чIварал гьал хъулухъчагIиги параялде тIаде щола. Амма я тIокъода я рагъида Манап ватуларо. Цинги ригьние раккула. Ригьниги щибаб рокъоре раккула кивго Манап ватуларо. Гьедин рукIадго агрономасда цо сас рагIула мангиялда гъоркьан. Шаклъарал гьал мангиялде рехараб цIахаги борхизабун гъоркье раккидал, кIичIван къуларав Манап вихьула гьенив.

- Мун гьенив мангиялда гъоркьгIаги щиб гьабулеван гьаз гьикъидал
— Дагьабищ букIунеб мангиялда гъоркь гьабизе хIалтIиян кьварун кIалъала ццин бахъарав Манап ))
Параялдего чуча-хъухъун ццингин, лъахь-лъахьиялда къватIивеги хъурщула. Хасияталъго «ХIадурав» Манап хIадур вугинги бихьизабулаго.

Автор Сайгидахмед Ахмеднабиев
Фото коллаж М.Аварский


просмотров: 28864 Опубликовано: автор: admin размещено в: Лъугьа-бахъараб

Добавить комментарий

You must be logged in to post a comment.